Ndërkohë që viti po mbyllet, pata një moment reflektimi—mirënjohjeje për rrugëtimin e vitit 2024. Ka qenë një vit i mbushur me sfida, trishtim dhe lumturi dhe gjatë gjithë kohës, mirënjohja ka qenë spiranca ime e vazhdueshme. Të bërit një hap mbrapa për të pranuar gjithçka që kam në jetën time, më ka lejuar të çmoj më shumë jetën.
Mirënjohje për Familjen time
Para së gjithash, unë jam thellësisht mirënjohëse për prindërit e mi. Prania e tyre në jetën time më mësoi mbi dashurinë pa kushte. Rrugëtimi i rritjes dhe zhvillimit nuk ndodh vetëm, dhe ajo çka më kanë dhënë vazhdon të formojë atë që jam sot.
Njëkohësisht, jam mirënjohëse për motrën dhe nipin tim. Familja lidhet me përvojat e përbashkëta, rritjen dhe dashurinë. Motra ime është dëshmitare e gjithë jetës sime dhe ka qenë një burim mbështetjeje dhe gëzimi. Ajo ishte gjithmonë aty dhe më e fortë se unë.
Mirënjohje për Shëndetin
Ky vit më ka kujtuar edhe dhuratën e paçmuar të shëndetit. Unë jam thellësisht mirënjohëse për aftësinë për të lëvizur, për të vrapuar dhe për të ndier forcën e trupit tim ndërsa ndërmarr sfida të reja gjatë jetës. Vrapi është më shumë se thjesht një aktivitet fizik për mua – është një simbol i qëndrueshmërisë dhe lirisë. Më lejon të lidhem me botën, duke ofruar momente qartësie, paqeje dhe krenarie. Në një botë ku shëndeti shpesh mund të merret si i mirëqenë, unë e çmoj aftësinë fizike për të jetuar plotësisht.
Mirënjohje për Dashurinë
Sipas meje, dashuria është emocioni më i rëndësishëm që ne ndjejmë. Jam mirënjohëse që ndjehem e dashuruar, pasi është një emocion që më përmbush ditën dhe jetën, në disa aspekte që nuk mund t’i përshkruaj. Ky është urimi im kryesor për të gjithë në vitin 2025. Është një nga gjërat që nuk varen vetëm nga ju dhe keni nevojë për pak fat.
Mirënjohje për Udhëtimet
Udhëtimi për mua ka qenë gjithmonë një mënyrë për të eksploruar botë të reja. Unë jam mirënjohëse për mundësinë e të udhëtuarit herë pas here. Çdo destinacion ka pasuruar të kuptuarin tim për kulturat, historitë dhe peisazhet. Udhëtimi më ka ndihmuar të jem më mirënjohëse në jetën time dhe të vlerësoj gjërat e thjeshta. Udhëtimet më kanë ndihmuar të njoh veten time për atë që jam në të vërtetë. Kjo na çon në gjënë e fundit për të cilën jam mirënjohëse.
Mirënjohje për Veten time
Ndoshta më e rëndësishmja, unë jam mirënjohëse për veten time – mirënjohëse për atë që jam dhe personin që po bëhem. Kam mësuar se rritja personale ka të bëjë me zhvillimin e vetes në përputhje me botën. Unë jam mirënjohëse për aftësinë time për të përqafuar pikat e mia të forta dhe për gatishmërinë time për të ecur përpara në harmoni me botën. Të qenit mirënjohës për veten shpesh neglizhohet, megjithatë është baza ku ngrihen të gjitha mirënjohjet e tjera.
Ndërsa viti 2024 po mbyllet, reflektimet e mirënjohjes do ti mbaj me vete në vitin e ri. Këto mendime shërbejnë si një kujtesë se, ndërsa bota mund të jetë e madhe dhe vazhdimisht në ndryshim, ka gjithmonë diçka – të madhe apo të vogël – për të cilën duhet të jemi mirënjohës. Sa më shumë të jam mirënjohëse, aq më shumë gjej gëzim brenda meje dhe në botën që më rrethon.
